मनमाड(प्रतिनिधी) :- वाहन चालवताना कट लागल्याच्या एका किरकोळ कारणावरून कार चालकाने दुचाकीस्वारावर थेट चाकूने प्राणघातक हल्ला केल्याची धक्कादायक घटना मनमाड शहरात घडली आहे. या भीषण हल्ल्याचा सर्व थरार परिसरातील सीसीटीव्ही कॅमेऱ्यात कैद झाला आहे.इरफात बेग असे या घटनेत गंभीर जखमी झालेल्या तरुणाचे नाव आहे. इरफात हा आपल्या दुचाकीवरून जात असताना, चोपडा पेट्रोल पंपाजवळ येवल्याच्या दिशेने जाणाऱ्या एका भरधाव कारचा त्याच्या दुचाकीला कट लागला. या अपघातानंतर इरफातने कार चालकाला जाब विचारण्याचा प्रयत्न केला. मात्र, याचा राग आल्याने कार चालकाने गाडीतून उतरून थेट चाकू काढला आणि इरफातवर हल्ला करत त्याला भोसकले.
हल्ला केल्यानंतर आरोपी कार चालकाने घटनास्थळावरून येवल्याच्या दिशेने सुसाट वेगाने पळ काढला. मनमाड पोलिसांनी तात्काळ या घटनेची माहिती येवला पोलिसांना दिली आणि नाकाबंदी करण्याचे आदेश दिले. येवला पोलिसांनी संशयास्पद कार अडवण्याचा प्रयत्न केला असता, कार चालकाने थेट पोलिसांच्या अंगावरच वाहन घालण्याचा मुजोरपणा केला. मात्र, पोलिसांनी जीवाची बाजी लावत कार चालकाला जागेवरच दरोडला.पोलिसांनी कार चालक लक्ष्मीकांत शेजवळ याला ताब्यात घेतले असून त्याच्यावर गुन्हा दाखल केला आहे. या हल्ल्यात गंभीर जखमी झालेल्या इरफात बेग याला तातडीने रुग्णालयात हलवण्यात आले असून, सध्या त्याच्यावर मालेगाव येथील एका खासगी रुग्णालयात उपचार सुरू आहेत. या घटनेमुळे मनमाड शहरात काही काळ प्रचंड खळबळ उडाली होती. पोलीस पुढील तपास करत आहेत.
✍🏻मुख्य संपादक – अमीन नवाब शेख
