मनमाड नगरपरिषदेच्या बेकायदेशीर अतिक्रमण कारवाईची चौकशी होणार; मुख्यमंत्र्यांच्या निर्देशानंतर चौकशी समिती गठीत

​मनमाड(प्रतिनिधी):- मनमाड नगरपरिषदेमार्फत १ व २ जून २०२६ रोजी शहरात राबवण्यात आलेल्या अतिक्रमण कारवाईच्या चौकशीसाठी नाशिकचे जिल्हाधिकारी आयुष प्रसाद यांनी चौकशी समितीची स्थापना केली आहे. भाजप नेते व कृषी उत्पन्न बाजार समितीचे माजी सभापती दीपक गोगड यांनी दिलेल्या तक्रारीची दखल घेत मुख्यमंत्री सचिवालयाच्या निर्देशानुसार ही कारवाई करण्यात आली आहे.यामुळे शहरात खळबळ उडाली असुन शहरातील अतिक्रमण काढतांना दुजाभाव करण्यात आल्याचा आरोप सत्ताधारी गटातील नगरसेवक अमजद पठाण, राकेश ललवाणी यांनी सर्वसाधारण सभेत बोलून दाखवत यावरून मोठे वादळ उभे केले होते त्यानंतर 15 ऑगस्ट नंतर शहरातील इतर अतिक्रमण काढण्यात येईल असे आश्वासन मुख्याधिकारी शेषराव चौधरी यांनी दिले होते.

         मनमाड नगरपरिषदेने नियमबाह्य व बेकायदेशीर पद्धतीने मालेगाव चौफुली व इतर परिसरातील खाजगी मालकीच्या मिळकतींवर तसेच दुकानदारांवर हातोडा चालवून नागरिकांचे मोठे आर्थिक नुकसान केले, असा आरोप दीपक गोगड यांनी केला होता. याप्रकरणी जिल्हाधिकारी कार्यालयाने नगरपरिषदेस तीन वेळा ‘कारण दाखवा’ नोटीस बजावूनही कोणताही खुलासा न मिळाल्याने, गोगड यांनी राज्याचे मुख्यमंत्री देवेंद्र फडणवीस व आपत्ती व्यवस्थापन मंत्री गिरीष महाजन यांच्याकडे पाठपुरावा केला होता.त्याची गंभीर दखल घेत मुख्यमंत्री देवेंद्र फडणवीस यांच्या सचिवांनी

​चौकशी समितीची स्थापना करण्याचे आदेश दिले त्यानुसार जिल्हाधिकारी आयुष्य प्रसाद यांनी जिल्हा सह आयुक्त (नगरपरिषद प्रशासन) श्याम विठ्ठल गोसावी यांच्या देखरेख व मार्गदर्शनाखाली ही चौकशी समिती स्थापन करण्यात आली आहे.या चौकशी समितीने सात दिवसाच्या आत अहवाल सादर करण्याचे आदेश देखील देण्यात आले आहे.