मनमाड (अजहर शेख):येथील कसाई मोहल्ला परिसरात असलेल्या महावितरणच्या एका डी पी ला (DP) भीषण आग लागल्याची घटना घडली आहे. वाढत्या उष्णतेमुळे ही आग लागल्याचा प्राथमिक अंदाज आहे. मात्र, वेळीच वीज पुरवठा खंडित केल्यामुळे कोणतीही जीवित किंवा वित्त हानी झाली नाही.
उष्णतेमुळे शॉर्ट सर्किट?
गेल्या काही दिवसांपासून तापमानात मोठी वाढ झाली आहे. या कडाक्याच्या उन्हामुळे डी पी वरील वायरचे प्लास्टिक कोटिंग वितळले आणि त्यातून ही आग लागल्याचे समजते. आगीच्या ज्वाळा पाहून परिसरात काही काळ घबराटीचे वातावरण निर्माण झाले होते.
तातडीने उपाययोजना
घटनेची माहिती मिळताच महावितरणचे कर्मचारी आणि अधिकारी तातडीने घटनास्थळी दाखल झाले. प्रसंगावधान राखून संबंधित भागाचा विद्युत प्रवाह तातडीने बंद करण्यात आला. यामुळे मोठा अनर्थ टळला.
“उन्हाच्या तीव्रतेमुळे वायरवरील प्लास्टिक वितळून ही आग लागली होती. आमचे कर्मचारी त्वरित घटनास्थळी पोहोचले असून दुरुस्तीचे काम युद्धपातळीवर सुरू करण्यात आले आहे. वीज पुरवठा लवकरच सुरळीत होईल.”
— संदीप तळले (अधिकारी, महावितरण)
सध्या महावितरणकडून डी पी च्या दुरुस्तीचे काम सुरू असून लवकरच या भागाचा वीज पुरवठा पूर्ववत केला जाणार आहे.
✍🏻मुख्य संपादक – अमीन नवाब शेख
