मनमाड एसटी आगारात प्रवाशाची अडवणूक; सवलत पाससाठी जादा पैसे उकळल्याचा खळबळजनक आरोप

मनमाड(विशेष प्रतिनिधी,,) : महाराष्ट्र राज्य परिवहन महामंडळाच्या मनमाड आगारात प्रवाशांना देण्यात येणाऱ्या वागणुकीचा अत्यंत धक्कादायक प्रकार समोर आला आहे. सवलत पास काढण्यासाठी आलेल्या एका वृद्ध प्रवाशाला दिवसभर ताटकळत ठेवून, त्यांच्याकडून नियमापेक्षा जास्त पैसे उकळल्याचा आणि त्यांना अपमानित केल्याचा गंभीर आरोप एका तक्रार अर्जाद्वारे करण्यात आला आहे.नांदगाव तालुक्यातील मोहेगाव येथील रहिवासी नामदेव कारभारी शिंदे यांनी याप्रकरणी मनमाडच्या आगार व्यवस्थापकांकडे लेखी तक्रार दाखल केली आहे.

             शिंदे हे १७  मे २०२६ रोजी सकाळी ११ च्या सुमारास एसटीचा सवलत पास काढण्यासाठी मनमाड आगारात गेले होते. मात्र, तिथल्या संबंधित कर्मचाऱ्यांनी त्यांना सकाळी ११ ते सायंकाळी ७:३० वाजेपर्यंत विनाकारण बसवून ठेवले.तक्रारदाराने अर्जात नमूद केल्यानुसार, सवलत पाससाठी अधिकृत शुल्क २०० रुपये असताना, तिथल्या व्यवस्थापन कर्मचाऱ्यांनी त्यांच्याकडून १०० रुपये जादा, म्हणजेच एकूण ३०० रुपये घेतले. विशेष म्हणजे, जास्तीचे पैसे देऊनही त्यांना सायंकाळपर्यंत पास देण्यात आला नाही. जेव्हा त्यांनी या दिरंगाईबद्दल विचारणा केली, तेव्हा त्यांना अत्यंत हीन दर्जाची आणि अपमानजनक वागणूक देण्यात आली.यावेळी संबंधित कर्मचाऱ्यांनी “तुम्हाला ज्याच्याकडे तक्रार करायची आहे त्याच्याकडे करा, आमचे कोणीही काही वाकडे करू शकत नाही, माझ्या नादी लागू नका” अशा शब्दांत अरेरावी केल्याचा आरोप शिंदे यांनी केला आहे. सरकारी कार्यालयात सर्वसामान्य नागरिकांची होणारी ही पिळवणूक आणि कर्मचाऱ्यांची मुजोरी आता चव्हाट्यावर आली आहे.एकीकडे एसटी महामंडळ प्रवाशांच्या सेवेसाठी हे ब्रीदवाक्य मिरवत असताना, दुसरीकडे आगारात होणारा हा भ्रष्टाचार आणि उद्धटपणा प्रवाशांच्या संतापाचे कारण ठरत आहे. आगार व्यवस्थापक या तक्रारीची दखल घेऊन संबंधित दोषी कर्मचाऱ्यांवर काय कारवाई करतात का, याकडे आता सर्वांचे लक्ष लागले आहे. पीडित प्रवाशाने या प्रकरणाची सखोल चौकशी करून आपल्याला न्याय मिळावा, अशी मागणी केली आहे.