मनमाड येथे छत्रपती शिवाजी महाराजांच्या प्रतिमेची विटंबना; शिवप्रेमींमध्ये तीव्र संताप, पालिकेकडून जाहीर माफी आणि कारवाईची मागणी

मनमाड(प्रतिनिधी):- येथील दहेगाव शिवारातील नगर पालिकेच्या कचरा डेपोमध्ये छत्रपती शिवाजी महाराजांच्या प्रतिमेचा घोर अपमान झाल्याची अत्यंत संतापजनक घटना समोर आली आहे. कचरा विलगीकरण करणाऱ्या मशीनवर महाराजांचा फोटो अतिशय घाणेरड्या आणि दुर्लक्षित अवस्थेत ठेवण्यात आल्याचे उघडकीस आले असून, याचे फोटो समाजमाध्यमांवर व्हायरल झाल्यानंतर संपूर्ण मनमाड शहरात शिवप्रेमींकडून तीव्र संताप व्यक्त केला जात आहे.

           मिळालेल्या माहितीनुसार, दहेगाव येथील पालिकेच्या कचरा डेपोत कचऱ्याचे वर्गीकरण करणाऱ्या मशीनवर ही पूजनीय प्रतिमा धुळीत आणि घाणीत पडून होती. कोट्यवधी जनतेचे आराध्य दैवत असलेल्या छत्रपती शिवाजी महाराजांच्या प्रतिमेची अशा प्रकारे कचरा डेपोत विटंबना झाल्याचे पाहून नागरिकांच्या आणि शिवप्रेमींच्या भावना तीव्र दुखावल्या गेल्या आहेत.या घटनेनंतर शिवप्रेमींनी आक्रमक पवित्रा घेतला असून, “छत्रपती शिवाजी महाराजांचे नाव घेऊन सत्तेवर यायचे आणि दुसरीकडे त्यांच्याच प्रतिमेचा असा अवमान करायचा, हा सर्रास प्रकार सुरू आहे,” अशा शब्दांत नागरिकांनी सत्ताधारी आणि पालिका प्रशासनाचा तीव्र निषेध केला आहे. प्रशासनाच्या या निष्काळजीपणाबद्दल नागरिकांमधून संतप्त प्रतिक्रिया उमटत आहेत.

या गंभीर प्रकरणाची दखल घेऊन मनमाड पालिका प्रशासनाने तातडीने संबंधित दोषी कर्मचाऱ्यांवर कठोर कायदेशीर कारवाई करावी, तसेच संपूर्ण शिवप्रेमींची  जाहीर माफी मागावी, अशी मागणी आता जोर धरू लागली आहे. दोषींवर त्वरित कारवाई न झाल्यास तीव्र आंदोलन छेडण्याचा इशारा स्थानिक शिवप्रेमी आणि नागरिकांनी दिला आहे.या संवेदनशील घटनेमुळे शहरात कायदा व सुव्यवस्थेचा प्रश्न निर्माण होऊ नये, यासाठी प्रशासनाने तात्काळ पावले उचलणे गरजेचे झाले आहे.