​नांदगाव (प्रतिनिधी):- नांदगाव येथील भूमी अभिलेख कार्यालयासमोर जमिनीच्या सुनावणीसाठी आलेल्या तक्रारदाराला व त्यांच्या मुलाला जुन्या वादातून शिवीगाळ करत दगडाने व लाथाबुक्यांनी मारहाण केल्याची घटना समोर आली आहे. या प्रकरणी नांदगाव पोलीस ठाण्यात पाच जणांविरुद्ध भारतीय न्याय संहितेच्या (BNS) विविध कलमांनुसार गुन्हा दाखल करण्यात आला असून, पोलिसांनी तीन आरोपींना अटक केली आहे.यातील आरोपींना तीन दिवसांची पोलीस कोठडी सुनावण्यात आली असूनही यातील दोन आरोपी फरार आहेत.
​
​           याबाबत अधिक वृत्त असेंकी  १ ऑक्टोबर २०२६ रोजी दुपारी १:३० ते २:०० वाजण्याच्या सुमारास नागापूर (ता. नांदगाव) येथील रहिवासी व  सरपंच राजेंद्र सयाजी पवार (वय ५४) हे आपल्या मुलांसह भूमी अभिलेख कार्यालयात आलेल्या नोटीसच्या सुनावणीसाठी गेले होते. तेथे उपस्थित असलेल्या संशयित आरोपींनी पूर्ववैमनस्यातून त्यांना अर्वाच्य भाषेत शिवीगाळ करत मारहाण करण्यास सुरुवात केली.  या मारहाणीदरम्यान संशयित रघुनाथ काळू सोमासे याने दगड उचलून तक्रारदाराचा मुलगा पवन पवार याच्या डोक्यात मारल्याने तो गंभीर जखमी झाला. तसेच ‘तू सरपंच झाला म्हणून खूप माजला आहेस, तुझा बेतच पाहतो’ अशी धमकी देऊन दमदाटी करण्यात आली. जखमी पवन यास उपचारासाठी तातडीने नांदगाव येथील सरकारी दवाखान्यात करण्यात आले, तेथून पुढील उपचारासाठी मालेगाव येथे हलवण्यात आले आहे.  या प्रकरणी राजेंद्र पवार यांच्या तक्रारीवरून नांदगाव पोलिसांनी गुन्हा दाखल केला आहे.  यात १. रघुनाथ काळू सोमासे २. सागर रघुनाथ सोमासे ३. प्रवीण रघुनाथ सोमासे ४. सागर अशोक पवार ५. राजाराम काळू सोमासे (सर्व रा. नागापूर, ता. नांदगाव)  यांच्याविरोधात बीएनएस कलम ११८(१), ११५(२), ३५२, ३५१(२), ३५१(३), १८९(२), १९०, १९१(२) आणि ३२६ अंतर्गत गुन्हा दाखल करण्यात आला असुन  पोलीस कारवाईदरम्यान रघुनाथ काळू सोमासे, सागर रघुनाथ सोमासे आणि सागर अशोक पवार या तीन आरोपींना अटक करून ९ ऑक्टोबर २०२६ रोजी नांदगाव न्यायालयात हजर करण्यात आले. न्यायालयाने तिन्ही आरोपींना ३ दिवसांची पोलीस कोठडी सुनावली आहे. तर या प्रकरणातील इतर दोन आरोपी प्रवीण रघुनाथ सोमासे आणि राजाराम काळू सोमासे हे फरार असून पोलीस त्यांचा शोध घेत आहेत.या प्रकरणाचा पुढील तपास पोलीस अंमलदार मुदस्सर अल्लाउद्दीन शेख करत आहेत.

The post नांदगाव भूमी अभिलेख कार्यालयासमोर जुन्या वादातून मारहाण; पाच जणांविरुद्ध गुन्हा दाखल, तीन आरोपींना ३ दिवसांची पोलीस कोठडी appeared first on MANMAD SAMRAT.

मनमाड–चांदवड राष्ट्रीय महामार्गावरील अपघातप्रवण ठिकाणी तातडीने उपाययोजना करा – गणेश जगन्नाथ धात्रक

मनमाड(प्रतिनिधी) : मनमाड शहरातून जाणाऱ्या मनमाड–चांदवड राष्ट्रीय महामार्ग क्र. ७५२ G वरील वाढती वाहतूक, अपघातांचे प्रमाण तसेच नागरिकांच्या सुरक्षिततेचा प्रश्न लक्षात घेऊन भारतीय जनता पार्टीचे नांदगाव विधानसभा प्रमुख, माजी नगराध्यक्ष मनमाड तथा कृषी उत्पन्न बाजार समिती, मनमाडचे सभापती श्री. गणेश जगन्नाथ धात्रक यांनी आज दि. ०८ ऑक्टोबर २०२६ रोजी महाराष्ट्र राज्य रस्ते विकास महामंडळाच्या (MSRDC) कार्यकारी अभियंता श्रीमती नेहते मॅडम यांची प्रत्यक्ष भेट घेऊन याबाबत सविस्तर निवेदन दिले.

मनमाड शहरातून जाणाऱ्या मनमाड–चांदवड राष्ट्रीय महामार्गावर दिवसभर मोठ्या प्रमाणावर अवजड वाहने, मालवाहू वाहने, प्रवासी वाहने तसेच दुचाकी व चारचाकी वाहनांची वर्दळ असते. तसेच विविध ठिकाणी वाहतूक कोंडी, रस्त्यालगतची अतिक्रमणे व अपघातप्रवण परिस्थिती निर्माण होत असल्याने नागरिक, विद्यार्थी, महिला, ज्येष्ठ नागरिक तसेच स्थानिक वाहनधारकांच्या सुरक्षिततेचा गंभीर प्रश्न निर्माण झाला आहे.

या पार्श्वभूमीवर गणेश जगन्नाथ धात्रक यांनी कृषी उत्पन्न बाजार समिती मनमाड गेट क्र. १ व २ समोर, डोणगाव चौफुली, सोनावाला कॉम्प्लेक्स समोर, तांबोळी कॉम्प्लेक्स समोर तसेच खडकजाई शाळेसमोर आणि बुरुकुलवाडी सुरू होण्यापूर्वी व त्यानंतरच्या परिसरात तातडीने वाहतूक नियंत्रण व रस्ता सुरक्षा उपाययोजना करण्याची मागणी केली.

यामध्ये स्पीड ब्रेकर, वेगमर्यादा दर्शविणारे फलक, ब्लिंकर/फ्लॅशर लाईट, स्ट्रीट लाईट, रिफ्लेक्टर, रोड मार्किंग, चेतावणी फलक तसेच आवश्यक त्या इतर रस्ता सुरक्षा उपाययोजना तातडीने करण्याची मागणी करण्यात आली. तसेच मनमाड शहरातून जाणाऱ्या महामार्गाची संपूर्ण सुरक्षा ऑडिट करून अपघातप्रवण व धोकादायक ठिकाणे निश्चित करून त्या ठिकाणी वेगनियंत्रणाची प्रभावी व्यवस्था करण्याची मागणीही करण्यात आली.

यावेळी श्रीमती नेहते, कार्यकारी अभियंता यांनी मनमाड–चांदवड रोडची लवकरच प्रत्यक्ष पाहणी करून रस्त्याची व अपघातप्रवण ठिकाणांची योग्य पाहणी करण्यात येईल. नागरिकांच्या सुरक्षिततेच्या दृष्टीने आवश्यक त्या उपाययोजना तातडीने करण्यात येतील, असे आश्वासन दिले.

मनमाड शहरातील नागरिकांच्या जीवितासंबंधीचा हा अत्यंत महत्त्वाचा विषय असून, केवळ अपघात घडल्यानंतर उपाययोजना करण्याऐवजी अपघात होऊ नयेत यासाठी प्रतिबंधात्मक उपाययोजना तातडीने करणे आवश्यक आहे, अशी भूमिका श्री. गणेश जगन्नाथ धात्रक यांनी यावेळी मांडली.

मनमाड–चांदवड महामार्गावरील नागरिकांच्या सुरक्षिततेसाठी करण्यात आलेल्या या मागणीमुळे लवकरच आवश्यक रस्ता सुरक्षा उपाययोजना प्रत्यक्षात येतील, अशी अपेक्षा व्यक्त करण्यात आली आहे.

The post मनमाड–चांदवड राष्ट्रीय महामार्गावरील अपघातप्रवण ठिकाणी तातडीने उपाययोजना करा – गणेश जगन्नाथ धात्रक appeared first on MANMAD SAMRAT.

मनमाड(प्रतिनिधी):- शहरातून जाणाऱ्या इंदूर-पुणे महामार्गावर अपघातांची मालिका सुरूच असून, आज पुन्हा एकदा एक भीषण आणि दुर्दैवी अपघात घडला आहे. येथील संत बार्णबा शाळेसमोर आयशर ट्रकखाली सापडल्याने एका १९ वर्षीय तरुणीचा जागीच मृत्यू झाला, तर तिच्यासोबत असलेला पाच वर्षांचा चिमुरडा गंभीर जखमी झाला आहे. या घटनेमुळे मनमाड शहरात तीव्र संताप आणि हळहळ व्यक्त केली जात आहे. कोमल पगारे असे मृत तरुणीचे नाव आहे.

याबाबत सविस्तर वृत्त असेंकी  आज (बुधवारी) पुण्याकडून मालेगावकडे जाणाऱ्या एका आयशर ट्रक (क्रमांक: UP 25 FT 2249) समोर अचानक कोमल पगारे ही तरुणी आली. वाहनचालकाने तातडीने ब्रेक लावून तिला वाचवण्याचा आटोकाट प्रयत्न केला; मात्र वेगातील ट्रकवर नियंत्रण मिळवणे कठीण झाले. हा अपघात इतका भीषण होता की, कोमल ही ट्रकखाली तब्बल ५० ते ६० फूट घसरत गेली. गंभीर दुखापत झाल्याने तिचा जागीच दुर्दैवी मृत्यू झाला.अपघाताच्या वेळी कोमलसोबत असलेला पाच वर्षांचा लहान बालकही गंभीर जखमी झाला आहे. अपघात घडताच स्थानिक नागरिकांनी घटनास्थळाकडे धाव घेतली आणि तातडीने मदतकार्य सुरू केले. नागरिकांनी जखमी बालकाला तात्काळ मनमाडच्या उपजिल्हा रुग्णालयात उपचारासाठी दाखल केले. घटनेची माहिती मिळताच मनमाड पोलिसांनी तातडीने घटनास्थळी धाव घेत पंचनामा केला आणि वाहतूक कोंडी सुरळीत केली.

**महामार्ग बनला ‘मृत्यूचा सापळा’, नागरिकांचा संताप**
हा महामार्ग सध्या वाहनधारकांसाठी आणि पादचाऱ्यांसाठी मृत्यूचा सापळा बनला आहे. अपघात घडलेल्या भागात संत बार्णबा शाळा असून विद्यार्थ्यांची आणि नागरिकांची येथे सतत वर्दळ असते. या परिसरात वाहनांचा वेग मर्यादित ठेवण्यासाठी नॅशनल हायवे अथॉरिटीने (NHAI) त्वरित गतिरोधक (स्पीड ब्रेकर्स) बसवावेत, अशी मागणी स्थानिक नागरिकांनी आक्रमकपणे केली आहे. “नॅशनल हायवे अथॉरिटी अजून किती निष्पाप नागरिकांचे बळी घेणार?” असा संतप्त सवाल आता सर्वसामान्य जनतेकडून उपस्थित केला जात आहे.

The post मनमाड इंदूर-पुणे महामार्गावर भीषण अपघात: आयशर ट्रकखाली चिरडून १९ वर्षीय तरुणीचा जागीच मृत्यू, ५ वर्षांचा बालक गंभीर appeared first on MANMAD SAMRAT.

​मनमाड ( प्रतिनिधी):मनमाड शहर व नांदगाव तालुक्यातील चर्मकार समाजाच्या सामाजिक व धार्मिक कार्यक्रमांसाठी हक्काची जागा आणि सभागृह उपलब्ध व्हावे, यासाठी ‘राष्ट्रीय चर्मकार महासंघ’ च्या वतीने दिंडोरी लोकसभेचे खासदार  भास्कर भगरे सर यांना निवेदन देऊन विकासकामांसाठी निधी मंजूर करण्याची आग्रही मागणी करण्यात आली आहे.  राष्ट्रीय चर्मकार महासंघाचे महाराष्ट्र राज्य उपाध्यक्ष  राजाभाऊ आहेर आणि उत्तर महाराष्ट्र उपाध्यक्ष शैलेश प्रकाश सोनवणे यांच्या नेतृत्वाखाली हे निवेदन खासदार भगरे यांना सादर करण्यात आले याबाबत सविस्तर चर्चा करून आपल्या निवेदनाबाबतीत सकारात्मक विचार करुन आपल्याला निधी उपलब्ध करून दिला जाईल असे आश्वासन खासदार भगरे यांनी शिष्टमंडळाला दिले.
मनमाड शहर आणि नांदगाव तालुक्यात साधारणतः ५,००० चर्मकार कुटुंबे वास्तव्यास आहेत. हा समाज अत्यंत कष्टकरी असून पारंपरिक व्यवसाय व नोकरी करून आपली उपजीविका चालवतो. धार्मिक, सामाजिक तसेच लहान-मोठे कार्यक्रम एकत्र येऊन करण्यासाठी समाजाकडे स्वतःचे हक्काचे मंदिर किंवा सभागृह उपलब्ध नाही. मनमाड शहर हद्दीत सर्व्हे नं. ३५४/३/४ पैकी १८९१ चौ.मी. क्षेत्र महाराष्ट्रीय चर्मकार संघासाठी उपलब्ध आहे या जागेचा योग्य विनियोग करण्यासाठी तिथे एक भव्य हॉल (सामाजिक सभागृह), काही खोल्यांचे बांधकाम आणि परिसराचे सुशोभीकरण करण्यासाठी खासदार निधीतून आवश्यक निधी मंजूर करावा, अशी नम्र विनंती निवेदनाद्वारे करण्यात आली आहे. या विकासकामामुळे समाजातील सर्व घटकांना एकत्र येऊन सामाजिक उपक्रम राबवणे सोपे जाईल आणि समाजाला मोठ पाठबळ मिळेल, असा विश्वास संघटनेच्या पदाधिकाऱ्यांनी व्यक्त केला आहे. निवेदनासोबत सदर जागेचा ८/अ उतारा आणि लेआऊट मॅप देखील जोडण्यात आला आहे.निवेदनावर  राजाभाऊ आहेर महा.उपाध्यक्ष शैलेश प्रकाश सोनवणे
उत्तर महाराष्ट्र उपाध्यक्ष नाना आहेर
मंदिर स.अध्यक् जे डी.वसईत डॉ.सुभाष अहिरे  वनाजी आहेर अशोक  शिलावट महेंद्र अहिरे  विजय धाकराव संजय धाकराव गोपी बडोदे रमेश भदाणे व समाज बांधवाच्या सह्या आहेत .

The post मनमाड येथे चर्मकार समाजासाठी सामाजिक सभागृह व सुशोभीकरणासाठी निधी देण्याची खासदार भास्कर भगरे यांच्याकडे निवेदनाद्वारे मागणी appeared first on MANMAD SAMRAT.

मनमाड (प्रतिनिधी):- शालेय शिक्षण व क्रीडा विभाग, क्रीडा व युवक सेवा संचालनालय (महाराष्ट्र राज्य, पुणे) तसेच जिल्हा क्रीडा अधिकारी कार्यालय, नाशिक व जिल्हा क्रीडा परिषद, नाशिक यांच्या संयुक्त विद्यमाने आयोजित तालुकास्तरीय आंतरशालेय मैदानी स्पर्धेत येथील सेंट झेव्हियर्स हायस्कूलच्या विद्यार्थ्यांनी उत्कृष्ट कामगिरी करत सुवर्ण, रौप्य व कांस्यपदकांची लुटालूट केली. या यशासह शाळेच्या अनेक खेळाडूंनी पुढील जिल्हास्तरीय स्पर्धेतील आपले स्थान पक्के केले आहे.

​स्पर्धेत १४ वर्षांखालील (U-14) आणि १७ वर्षांखालील (U-17) मुलगे व मुलींच्या विविध गटांत विद्यार्थ्यांनी बजावलेली कामगिरी खालीलप्रमाणे :

​१४ वर्षांखालील (U-14) मुले :

– ​पियुष मोहन अहिरे : १०० मी. धावणे (प्रथम), थाळीफेक (द्वितीय)

– ​चैतन्य दशरथ खंबाइत : उंच उडी (प्रथम), लांब उडी (द्वितीय), २०० मी. धावणे (तृतीय)

– ​सार्थक अशोक देवकर :४०० मी. धावणे (द्वितीय), १०० मी. धावणे (तृतीय)

– ​भावेश लक्ष्मण बंगाळ : उंच उडी (तृतीय)

– ​गणेश कैलास जाधव :गोळाफेक (तृतीय)

​१७ वर्षांखालील (U-17) मुले :

– ​तेजस लहानु सदगीर : लांब उडी (प्रथम), उंच उडी (प्रथम)

– ​साई संदीप उगले : भालाफेक (प्रथम)

– ​साई चंद्रकांत चुंबळकर :थाळीफेक (प्रथम)

– ​अलोक अमोल लंकेश्वर :२०० मी. धावणे (द्वितीय)

– ​उदय मधुकर निपुंगळे :८०० मी. धावणे (द्वितीय)

– ​आदर्श संजीव ढोणे : १५०० मी. धावणे (द्वितीय)

– ​किरण शिवाजी खांडवी :उंच उडी (द्वितीय)

– ​रोशन बाबासाहेब निकम : थाळीफेक (द्वितीय)

– ​कृष्ण भास्कर बेदाडे :भालाफेक (द्वितीय)

– ​मनीष परशुराम कांबळी :४०० मी. धावणे (तृतीय)

​१४ वर्षांखालील (U-14) मुली :

– ​विधीका नामदेव पठाडे :६०० मी. धावणे (प्रथम), १०० मी. धावणे (तृतीय)

दिव्या भाऊराव शिंदे : थाळीफेक (प्रथम)

​१७ वर्षांखालील (U-17) मुली :

– ​मिसबा इमरान शेख : ४०० मी. धावणे (प्रथम), थाळीफेक (तृतीय)

– ​समृद्धी रावसाहेब नाईकवाडे : थाळीफेक (प्रथम)

– ​मोहिनी बापू जगताप :भालाफेक (प्रथम)

– ​अमृता अशोक जगताप : १०० मी. धावणे (द्वितीय), २०० मी. धावणे (तृतीय)

– ​सुप्रिया धनराज सानप :भालाफेक (द्वितीय)

– ​आर्या कृष्णा झाल्टे : १०० मी. धावणे (तृतीय)

यशस्वी विद्यार्थ्यांना शाळेचे क्रीडा शिक्षक परविंदरसिंग रिसम,विशाल झाल्टे, दत्तू जाधव व स्वप्निल बाकळे यांचे मोलाचे मार्गदर्शन लाभले.​खेळाडूंच्या या दैदीप्यमान यशाबद्दल शाळेचे मुख्याध्यापक फादर माल्कम, उपमुख्याध्यापिका सिस्टर ज्योत्स्ना, पर्यवेक्षक अनिल निकाळे, फादर विवेक तसेच सर्व शिक्षक व शिक्षकेतर कर्मचाऱ्यांनी सर्व विजयी खेळाडूंचे मनापासून अभिनंदन केले आणि आगामी जिल्हास्तरीय स्पर्धेसाठी शुभेच्छा दिल्या. सेंट झेव्हियर्स हायस्कूलच्या या यशामुळे मनमाड शहरातून त्यांच्यावर अभिनंदनाचा वर्षाव होत आहे.

The post तालुकास्तरीय मैदानी स्पर्धेत सेंट झेव्हियर्स हायस्कूलचे घवघवीत यश; २४ खेळाडूंची जिल्हास्तरीय स्पर्धेत निवड appeared first on MANMAD SAMRAT.

ट्रिगर वन चे प्रतिबिंब प्रशासकीय अहवालात उमटणे आवश्यक – महेंद्र बोरसे

नाशिक(प्रतिनिधी):- केंद्र सरकारच्या दुष्काळ संहिता नियमांनुसार,खरीप हंगामातील दुष्काळाची अंतिम आणि कायदेशीर घोषणा होणे बाकी असून सध्या केवळ पावसाची तूट व खंडाच्या आधारे ‘ट्रिगर-१’ लागू करून राज्यभरात प्रतिकूल परिस्थिती असलेल्या तालुक्यात निकषांची तालुकानिहाय व मंडळनिहाय पडताळणी व ई-पीक पाहणी सुरू आहे.त्यामुळे प्रशासनाने तांत्रिक त्रुटी न ठेवता वस्तुनिष्ठ अहवाल सादर करावा अशी मागणी राष्ट्रवादी काँग्रेस पक्ष शरदचंद्र पवार यांच्या वतीने तालुकाध्यक्ष महेंद्र बोरसे यांनी केली आहे.
दुष्काळ संहितेच्या निकषांनुसार,राज्यातील २० जिल्ह्यांमधील १४० तालुक्यांमध्ये प्राथमिक निकषांच्या आधारे ‘ट्रिगर-१’ लागू होण्याची शक्यता किंवा प्राथमिक तांत्रिक प्रक्रिया वर्तवण्यात आली आहे.त्यात कृषी विभाग व हवामान विभागाच्या अहवालानुसार राज्यातील ८३ तालुक्यांमध्ये सलग २० ते २१ दिवसांपेक्षा जास्त काळ पावसाने ओढ (मोठा खंड) दिली आहे.ही संख्या ‘ट्रिगर-१’ मधील तीव्र टंचाई अनुभवणाऱ्या आणि सर्वाधिक खंड पडलेल्या तालुक्यांचे एक वेगळे मोजमाप आहे.सध्या राज्यात ट्रिगर-१ आणि पुढील तांत्रिक टप्प्यांचे (ट्रिगर-२ व ग्राउंड ट्रुथिंग म्हणजेच प्रत्यक्ष पाहणी) विश्लेषण सुरू आहे.ह्यात नाशिक जिल्ह्यातील मालेगाव,येवला,देवळा,नांदगांव,चांदवड तालुक्यातील ट्रिगर वन नॉर्मची पडताळणी करण्याचे आदेश प्रशासनाला दिले आहेत,शासनाने अद्याप अंतिम दुष्काळी तालुक्यांची अधिकृत यादी जाहीर केलेली नाही;परंतु सप्टेंबर अखेरपर्यंत किंवा ऑक्टोबरच्या पहिल्या आठवड्यात संपूर्ण पाहणी करून याबाबत अधिकृत घोषणा होण्याची शक्यता आहे.त्यामुळे स्थानिक प्रशासनाने वस्तुनिष्ठ अहवाल सादर करून तालुक्याचा समावेश दुष्काळग्रस्त जाहीर अंतिम यादीत होईल ह्यासाठी पाठपुरावा करावा अशी मागणी राष्ट्रवादी काँग्रेस पक्ष शरदचंद्र पवार यांच्या वतीने करण्यात आली आहे.

The post ट्रिगर वन चे प्रतिबिंब प्रशासकीय अहवालात उमटणे आवश्यक – महेंद्र बोरसे appeared first on MANMAD SAMRAT.

माजी सभापती दीपक गोगड यांच्याकडून मुख्यमंत्री सहायता निधीला 51 हजाराची मदत

मनमाड(प्रतिनिधी):- राज्यात पावसाने दडी मारल्यामुळे सर्वत्र दुष्काळी परिस्थिती निर्माण झाली आहे. याच परिस्तिथीची संवेदनशीलतेणे नोंद घेत नाशिक जिल्ह्याचे पालकमंत्री ना.गिरीश महाजन यांनी नांदगाव तालुक्याच्या दुष्काळी भागाचा दौरा केला. या दौऱ्यात ना.महाजन यांनी ग्रामीण भागातील पिकांची पाहणी केली. सदर दौऱ्यात मनमाड बाजार समितीचे माजी सभापती दिपक गोगड यांनी दुष्काळ काळात शेतकरी बांधवाना सहायता म्हणून मुख्यमंत्री सहायता निधीस 51000 रुपयांचा धनादेश ना. महाजन यांच्याकडे सुपूर्त केला.

सध्या सप्टेंबर महिना सुरू आहे आणि राज्यात अनेक भागात पाऊस झालेला नाही यामुळे राज्यात दुष्काळी परिस्थिती निर्माण झाली आहे यावर मुख्यमंत्री देवेंद्र फडणवीस यांनी आपल्या मंत्रिमंडळाला आदेश दिले असुन सर्व पालकमंत्री व मंत्र्यांनी आपल्या जिल्ह्यात तालुक्यात पाहणी दौरा करून अहवाल सादर करावा यामुळे नाशिकचे पालकमंत्री ना गिरीश महाजन यांनी काल जिल्यात दौरा केला यावेळी त्यांनी नांदगाव तालुक्यातील भार्डी व अस्तगाव या ठिकाणी भेट देऊन पाहणी केली व अधिकाऱ्यांना पंचनामा करून अहवाल सादर करण्याचे आदेश केले यावेळी राज्यातून दुष्काळासाठी प्रथमच मुख्यमंत्री सहायता निधीस मनमाड येथील माजी सभापती दीपक गोगड यांनी त्यांचे योगदान नोंदविले.यावेळी त्यांनी पालकमंत्री गिरीश महाजन यांच्याकडे 51 हजाराचा धनादेश सुपूर्द केला यावेळी विधान परिषद आमदार गोकुळ गिते, नांदगावचे आमदार सुहास कांदे, भाजप जेष्ठ नेत्या जयश्री दौंड, बाजार समिती सभापती गणेश धात्रक, उपसभापती पुंजाराम आहेर, संचालक योगेश कदम, भाजपा तालुकाध्यक्ष मनीषा काकड, जयकुमार फुलवानी, मुकुंद एळींजे, गिरीश गोगड, आनंद बोथरा आदि उपस्थित होते.

The post माजी सभापती दीपक गोगड यांच्याकडून मुख्यमंत्री सहायता निधीला 51 हजाराची मदत appeared first on MANMAD SAMRAT.

The post शेतपिकांच्या नुकसानीचे तातडीने पंचनामे करून अहवाल सादर करावा ; पालकमंत्री गिरीश महाजन नांदगाव तालुक्यात विविध ठिकाणी पिकांची पाहणी करून शेतकऱ्यांशी साधला संवाद appeared first on MANMAD SAMRAT.

मनमाडमध्ये वागदर्डी पंपिंग स्टेशनवर पाणी पुरवठा कर्मचाऱ्याचा टाकीत पडून मृत्यू

​मनमाड(प्रतिनिधी):- मनमाड शहराला पाणीपुरवठा करणाऱ्या वागदर्डी येथील पंपिंग स्टेशनवर आज सकाळी एक अत्यंत हृदयद्रावक घटना घडली आहे. येथे कार्यरत असलेले कर्मचारी  प्रशांत  काशिनाथ बोडके (वय ५७ वर्षे) यांचा काम करत असताना पाय घसरून पाण्याच्या टाकीत पडल्याने दुर्दैवी मृत्यू झाला आहे. या घटनेमुळे मनमाड शहर आणि परिसरात तीव्र शोककळा पसरली आहे.घटनेची माहिती मिळताच कर्मचाऱ्यांनी तात्काळ घटनास्थळी धाव घेऊन प्रशांतला बाहेर काढले मात्र तोपर्यंत वेळ होउन गेला होता.

           याबाबत सविस्तर वृत्त असेंकी  प्रशांत बोडके हे वागदर्डी येथील पंपिंग स्टेशनवर आपली रोजची कर्तव्ये बजावत होते. आज, २२ सप्टेंबर २०२६ रोजी सकाळी ८:३० वाजेच्या सुमारास काम करत असताना अचानक त्यांचा पाय घसरला आणि ते थेट पाण्याच्या टाकीत कोसळले. अचानक घडलेल्या या प्रसंगात त्यांचा जागीच दुर्दैवी अंत झाला.  घटनेची माहिती मिळताच स्थानिक नागरिकांनी व सहकाऱ्यांनी मदतीसाठी धाव घेतली, परंतु दुर्दैवाने त्यांना वाचवता आले नाही.दिवंगत प्रशांत बोडके (वय ५७) यांच्या पश्चात मोठा परिवार आहे. त्यांची अंतिम यात्रा आज, २२ सप्टेंबर २०२६ रोजी सायंकाळी ७:०० वाजता त्यांच्या केकाण नगर, HP गॅस गोडाऊनच्या मागील बाजूस असलेल्या राहत्या घरापासून निघाली होती

​मनमाड नगरपरिषद कर्मचारी, नागरिक आणि बोडके परिवाराच्या आप्तेष्टांकडून त्यांना भावपूर्ण श्रद्धांजली अर्पण करण्यात आली.

The post मनमाडमध्ये वागदर्डी पंपिंग स्टेशनवर पाणी पुरवठा कर्मचाऱ्याचा टाकीत पडून मृत्यू appeared first on MANMAD SAMRAT.

​नांदगाव(प्रतिनिधी ):- नांदगाव तालुक्यात या वर्षी पावसाने पूर्णपणे पाठ फिरवल्यामुळे भीषण टंचाई निर्माण झाली आहे. अल्प पर्जन्यमानामुळे खरीप हंगामातील सर्व पिके जळून खाक झाली असून तालुक्यातील बळीराजा पूर्णपणे हवालदिल झाला आहे. या गंभीर पार्श्वभूमीवर नांदगाव तालुका शिवसेना (उद्धव बाळासाहेब ठाकरे) पक्षाच्या वतीने तहसीलदारांना निवेदन देऊन संपूर्ण नांदगाव तालुक्यात कोणत्याही अटी-शर्तींशिवाय तातडीने ‘कोरडा दुष्काळ’ जाहीर करण्याची आग्रही मागणी करण्यात आली आहे. शिवसेना तालुकाप्रमुख संतोष मधुकर गुप्ता यांच्या नेतृत्वाखाली व प्रमुख पदाधिकाऱ्यांच्या उपस्थितीत हे निवेदन तहसील कार्यालयात सादर करण्यात आले.
तहसीलदार यांना दिलेल्या निवेदनात म्हटले आहे की पुरेसा पाऊस न झाल्याने मका, बाजरी, कापूस, सोयाबीन यांसारखी खरीप हंगामातील सर्व मुख्य पिके करपून गेली आहेत. शेतकऱ्यांचा पेरणीचा खर्चही वसूल झालेला नाही. विहिरी, बोअरवेल आणि कूपनलिकांच्या पाणीपातळीत प्रचंड घट झाली आहे. गावोगावी पिण्याच्या पाण्याची तीव्र टंचाई जाणवत असून जनावरांच्या चारा-पाण्याचा गंभीर प्रश्न निर्माण झाला आहे. कोरडवाहू (जिरायती) मका, बाजरी, सोयाबीन इत्यादी पिकांच्या भरपाईसाठी किमान ५०,०००/- रुपये प्रतिहेक्टरी थेट शेतकऱ्यांच्या खात्यावर जमा करावेत तर बागायती व फळ पिक डाळिंब, कांदा, द्राक्ष यांसारख्या फळबागा पाण्याच्या अभावामुळे वाळल्याने प्रतिहेक्टरी १,०००,०००/- (एक लाख) रुपये विशेष आर्थिक सहाय्य द्यावे.याशिवाय पीक विमा योजनेंतर्गत कोणत्या ही अटी न लावता ‘लोकल कॅलॅमिटी’ व ‘मिड-सीझन ॲडव्हर्सिटी’ नियमांनुसार सर्व बाधित शेतकऱ्यांना प्रतिहेक्टरी २५% अग्रीम (Advance) भरपाई तातडीने मंजूर करावी. मदतीची २ हेक्टरची अट शिथिल करून नुकसान झालेल्या संपूर्ण क्षेत्राला ही भरपाई लागू करण्यात यावी. शेतकऱ्यांची बँक कर्जे व वीजबिल माफ करून प्रतिहेक्टरी भरीव मदत द्यावी.
तालुक्यात तातडीने चारा छावण्या सुरू कराव्यात.
​पिण्याच्या पाण्यासाठी टँकर्सची संख्या वाढवावी व रोजगार हमी योजनेची कामे तातडीने सुरू करावीत असे म्हटले आहे तर नांदगाव तालुक्यातील बिकट परिस्थिती पाहता शासनाने कोणताही विलंब न करता संपूर्ण तालुक्यात ‘कोरडा दुष्काळ’ जाहीर करावा. शासनाने तातडीने सकारात्मक निर्णय न घेतल्यास शिवसेना (उद्धव बाळासाहेब ठाकरे) पक्षाच्या वतीने सर्वसामान्य बळीराजाला सोबत घेऊन तालुक्यात तीव्र जनआंदोलन छेडले जाईल, असा सज्जड इशारा निवेदनाद्वारे देण्यात आला आहे.निवेदनावर जिल्हाप्रमुख प्रवीण नाईक, तालुकाप्रमुख संतोष गुप्ता,मनमाड शहरप्रमुख माधव शेलार,शैलेश सोनवणे,खालिद शेख,जाफर मीरझा यांच्यासह शेकडो शिवसैनिकांच्या सह्या आहेत.

The post नांदगाव तालुक्यात तात्काळ ‘कोरडा दुष्काळ’ जाहीर करा; शिवसेना (उद्धव बाळासाहेब ठाकरे) पक्षाची तहसीलदारांकडे निवेदनाद्वारे जोरदार मागणी appeared first on MANMAD SAMRAT.