नांदगावला पावसाचा पहिला दिलासा: अर्धा तास मुसळधार, पण सबवे जलमय झाल्याने वाहतूक ठप्प!

नांदगाव(महेश पेवाल):- गेल्या काही दिवसांपासून असह्य उकाड्याने त्रस्त असलेल्या नांदगाव शहराला आज अखेर वरुणराजाने सुखद दिलासा दिला. आज संध्याकाळच्या सुमारास शहरात पावसाने जोरदार बॅटिंग केली. सुमारे अर्धा तास चाललेल्या या दमदार पावसामुळे वातावरणात गारवा निर्माण झाला असून, नागरिकांना उकाड्यापासून मोठा दिलासा मिळाला आहे. हा यंदाच्या पावसाळ्यातील पहिलाच मोठा पाऊस ठरला.

पहिलाच पाऊस अन् ‘तीच’ जुनी समस्या
पावसाने नागरिकांच्या चेहऱ्यावर आनंद आणला असला, तरी नेहमीप्रमाणे शहराची जुनी डोकेदुखी पुन्हा समोर आली आहे. पहिल्याच पावसाने रेल्वे सबवे परिसराला तलावाचे स्वरूप आले. सबवेमध्ये मोठ्या प्रमाणावर पाणी साचल्यामुळे या मार्गावरील वाहतूक पूर्णपणे ठप्प झाली होती.

वाहतूक विस्कळीत, प्रवाशांचे हाल
सबवेमध्ये पाणी साचल्यामुळे हा महत्त्वाचा रस्ता बंद करावा लागला. यामुळे रस्त्याच्या दोन्ही बाजूंना वाहनांच्या लांबच लांब रांगा लागल्या होत्या. पहिल्याच अर्ध्या तासाच्या पावसाने पालिका आणि संबंधित प्रशासनाच्या मान्सूनपूर्व कामांची पोलखोल केली असून, सबवेमधील पाण्याचा निचरा करण्यासाठी कायमस्वरूपी उपाययोजना करावी, अशी मागणी आता स्थानिक नागरिकांकडून केली जात आहे.