शाळा सुरू होण्याच्या पूर्वसंध्येला मनमाडमध्ये शालेय साहित्य खरेदीसाठी पालकांची एकच गर्दी!

मनमाड(प्रतिनिधी) :१५ जूनपासून नवीन शैक्षणिक वर्षाला सुरुवात होत असून, शाळेच्या पहिल्याच दिवशी आपल्या पाल्याला सर्व नवीन साहित्य मिळावे यासाठी मनमाड शहरात पालकांची आणि विद्यार्थ्यांची मोठी धावपळ सुरू आहे. शहरातील मुख्य बाजारपेठेतील ‘धिंग्रा एंटरप्रायझेस’ आणि इतर बुकस्टॉल्सवर वह्या, पुस्तके, दप्तर आणि इतर शालेय साहित्य खरेदी करण्यासाठी ग्राहकांची प्रचंड गर्दी पाहायला मिळत आहे.गेल्या काही दिवसांपासून शांत असलेल्या बाजारपेठेत आता शैक्षणिक साहित्याच्या खरेदीमुळे मोठी आर्थिक उलाढाल सुरू झाली आहे. बाजारात यंदा विविध कार्टून कॅरेक्टर्स असलेली दप्तरे, आकर्षक वॉटर बॉटल्स आणि डिझायनर कंपास बॉक्स उपलब्ध असून, ते लहान मुलांचे मुख्य आकर्षण ठरत आहेत.

कागदाच्या वाढत्या किमतींमुळे वह्या आणि पुस्तकांच्या दरात यंदा काहीशी वाढ झाल्याचे पालकांकडून सांगण्यात येत आहे. तरीही पाल्याच्या आनंदासाठी आणि शिक्षणासाठी पालक खरेदीत कोणतीही कसर सोडत नसल्याचे चित्र आहे. ग्राहकांची वाढती गर्दी लक्षात घेता दुकानदारांनीही अतिरिक्त कर्मचाऱ्यांची नियुक्ती केली आहे, जेणेकरून पालकांना वेळेत आणि सुटसुटीतपणे साहित्य खरेदी करता येईल.उद्यापासून (१५ जून) शाळांची घंटा वाजणार असल्याने आज रात्री उशिरापर्यंत ही खरेदी अशीच सुरू राहण्याची शक्यता व्यापाऱ्यांनी वर्तवली आहे.